سردار احمد علی خان دریشک یکم جنوری 1979 کو ضلع راجن پور کے ایک معزز گھرانے میں پیدا ہوئے ۔آپ کے دادا سردار نصراللہ خان دریشک پی پی 249 سے موجودہ ایم پی اے ہیں جو 1972-93 کے دوران مسلسل پانچ بار رکن پنجاب اسمبلی رہے اور ان کے پاس مختلف وزارتوں کے قلمدان رہے۔آپ کے دالد گرامی سردار نوازش علی خان، دریشک قبیلے کے چیف (تمن دار)ہیں جنہوں نے اپنے بچوں کی بہتر صحت وتعلیم کے لیے 1980 کے آخر میں قریبی ضلع ڈیرہ غازی خان جانے کا فیصلہ کیا ۔سردار احمد علی خان نے پچیس سال کی عمر میں سیاسی سفر کا آغاز کیا ۔اس نوجوان نے ڈیرہ غازی خان میں سیاست کے نئےسٹائل کو متعارف کروایا جہاں ان کی کوئی خاندانی سپورٹ نہ تھی کیونکہ ڈیرہ غازی خان ان کا آبائی ضلع نہ تھا ۔آپ نے ڈیرہ غازی خان میں سیاست کے میدان میں سخت جدوجہد کی چونکہ انہیں دو دیگر مقامی چیف قبائل سے براہ راست مقابلہ تھا ۔آپ نے پنجاب اسمبلی کی رکنیت کے لیے پہلا انتخاب مئی 2013 میں لڑا لیکن کامیاب نہ ہو سکے ۔آپ ایک زمیندار ہیں جنہوں نے ایک بار پھر انتخابات میں حصہ لیا اور سردار ذوالفقار خان کھوسہ سینیٹر ،کی خالی کردہ نشست پر 22 اگست 2013 کو منعقد ہونیوالے ضمنی انتخابات میں کامیابی حاصل کی ۔
